1986an sortu zen Lexikografia Saila, Euskaltzaindiko lanei lotua, eta ordutik corpusgintzan eta Hiztegi Batuko prestalanean dihardu batez ere. XX. mendeko euskararen corpus estatistikoa diseinatu eta osatu zuen UZEIk bere garaian, Hiztegi Batuaren oinarri izango zena, Orotariko Euskal Hiztegiarekin batera. Eta, azken urteotan, urrats bat aurrera eginez, Euskaltzaindiak abian jarri duen Lexikoaren Behatokia egitasmoan dihardu buru-belarri Elhuyar Fundazioarekin eta EHUko IXA taldearekin elkarlanean, eta corpus hori da Hiztegi Batuko lantaldearen aztergai berria, azken urteotako egunkari-aldizkarietan oinarritzen dena.

Bestelako proiektuak ere egin ditu sail honek, zenbait hiztegi osagarri prestatu baititu eta sarean edo plugin gisa eskaini: Maiztasun Hiztegia, Atzekoz aurrera. Hitz-bukaeren Hiztegia eta Sinonimoen Hiztegia, adibidez. Eta euLEX, Euskararen datu-base lexikala ere sail honen ardura da, UZEIko HNP saileko oinarrizko baliabidea dena.