Komunikazio zientifiko-teknikoa, eta Terminologia horren barnean, hizkuntzaren egungo bizkortasunaren seinalea da, eta etorkizunean irauteko bermea. Hori 1977an horrela esaten ez bazen ere, xede berezietako euskara eta, bereziki, espezialitate-hiztegiak izan ziren hasieratik UZEIren langai nagusia. Aitzindari izan zen UZEI Terminologian, hitz hori ia entzun ere egiten ez zen garai hartan. Ia 30 urteko ibilbide neketsu, eta inoiz eztabaidatsu, baten emaitza dira UZEIk egindako hiztegi guztiak, laurogei baino gehiago, eta horien bilduma den EUSKALTERM Terminologia Bankua.

UZEI izan da -eta da-, de facto, euskal terminologia-zentroa, neurri batean, ofizialtasunik izan gabe bada ere, bidea ireki eta gizartean itzal hori duena. Gaur egun Terminologia Batzordeko partaidea da UZEI, Euskararen Aholku Batzordearen baitan.