UZEIk ez zuen, hasiera batean behintzat, hiztegigintza arrunta bere eginkizunen artean, berezitua baizik. 1986an, baina, Euskaltzaindiaren egitasmoei lotuta sortu zen lexikografia-lana eta, ondorioz, Lexikografia Saila. Hain zuzen ere, Euskaltzaindiko Hiztegigintza Batzordeak gaurko euskararen berri emango zuen corpusaren beharra ikusi zuen eta UZEIk bere gain hartu zuen lan hau. Ordutik, euskaraz argitaratzen den guztia bildu eta, hortik abiatuta, estatistikoki corpusa osatzeaz gain, Hiztegi Batuko Lantaldearentzat prestalana egiten du, hitzei buruzko historiala bilduz.