Euskal Hiztegia (bigarren argitaraldia)
Euskal Hiztegia
Elkar argitaletxea
2007
1.055 orrialde

Bai, duela hamaika urte kaleratu zen Euskal Hiztegia haren edukia funtsean mantenduz, eguneratze eta egokitze lan bikaina egin du Ibon Sarasolak, aurreneko edizio hartatik hona Euskaltzaindiak Hiztegi Batuaren lehen pasaldia onartu duela aprobetxatuz. Zehazkiago esateko, duela hamaika urteko liburuan agertzen ez ziren eta Hiztegi Batuan sartu ziren hitzak jaso ditu oraingo honetan Ibonek (2.500 sarrera berri omen dira, autoreak berak hitzaurrean dioenez). Hitz horietako bakoitzak bere lehen aipamena eta erabilaldia, bere kategoria gramatikala, eta egileari beharrezkoa iruditu zaionean sinonimo nahiz antonimoak daramatza, baina aurrekoaz gain hiztegi honen ezaugarri nagusia eta erabiltzaileak gehien estimatzen duena, definizioa alegia, ere erantsi die hitz berriei. Lexikografia kontuetan erreferentzia saihestezina baldin bazen 1996ko Euskal Hiztegia, zer esanik ez oraingoan, azken urteotan arau bilakatu diren beste hainbat hitz gehituz eguneroko zalantzak eta duda-mudak argitzen lagunduko digun hiztegi lodikote honi buruz.